Қарасу ауданы білім бөлімінің "Целинный жалпы білім беретін мектебі" КММ оқушылары жазғы демалыс жоспары аясында Қостанай қаласындағы Ыбырай Алтынсарин мұражайына барып қайтты. Онда балалар ұлы ағартушы, педагог, қазақ жазба әдебиетінің негізін қалаушының өмірі мен қызметімен танысты. Экскурсия жетекшілері оның өмір жолының негізгі кезеңдері, Қазақстандағы білім мен мәдениетті дамытуға қосқан үлесі туралы айтып берді. Балаларға алғашқы қазақ мектептерімен, оқулықтарымен және Алтынсариннің хаттарымен байланысты экспонаттар ерекше қызығушылық тудырды.
Сондай - ақ, оқушылар Ойыншықтар мұражайында болып, әр дәуір мен халықтың түрлі ойыншықтарын тамашалады. Мұражайдың коллекциясы қазақтың дәстүрлі қуыршақтары мен шағын киіз үйлерден бастап, заманауи интерактивті экспонаттарға дейінгі байлығымен таңғалдырды.
Бұл танымдық әрі қызықты экскурсия балаларға жаңа білім, жарқын әсерлер мен көтеріңкі көңіл - күй сыйлады.
